حدوتة الارنب الغضبان

حدوتة الارنب الغضبان

كان يا مكان و لا يحلى الكلام الا بذكر النبى عليه الصلاة و السلام

كان فى مرة أرنوب صغير , قال لمامتو أنا جعان يا ماما , مامتو قالتلو كل خس و جزر يا ارنوب
أرنوب قالها : يوووووووووه هوا كل يوم خس و جزر أنا مش واكل , و خرج برا البيت

الأرنوب قعد يمشى يمشى لحد ما جاع خالص , قابل البطة فقالها يا بطة انا جعان , البطة قالتلو تعال يا ارنوب اصطاد معايا سمك من البحيرة و كل , الارنوب قالها : الارنب مش بياكل سمك يا بطة و سابها ومشى

الأرنوب قعد يمشى لحد ما قابل الفرخة فقالها يا فرخة انا جعان , الفرخة قالتلو تعال يا ارنوب كل معايا قمح من الارض , الارنوب قالها : الارنب مش بياكل قمح يا فرخة و سابها و مشى

الأرنوب قعد يمشى يمشى لحد ما قابل القطة فقالها يا قطة انا جعان , القطة قالتلو تعال يا ارنوب اشرب معايا لبن , الارنوب قالها : الارنب مش بيشرب لبن يا قطة و سابها و مشى

الأرنوب قعد يمشى يمشى لحد ما قابل الكلب , فقاله يا كلب انا جعان , الكلب قالو تعال يا ارنوب كل معايا العطمة دى , الارنوب قاله : الارنب مش بياكل عطم يا كلب و سابه و مشى

الارنوب رجع البيت و قال لمامتو أنا آسف يا ماما و مش هعمل كدا تانى و انا جعان

مامتو قالتلو مفيش غير الخس و الجزر يا أرنوب

الارنوب قال و أنا بحب الخس و الجزر و هاكلو على طول

و توتة توتة خلصت الحدوتة , حلوة و لا ملتوتة